கனவுகளைப் பொறுத்தவரையில் மனிதர்கள் நல்ல கனவும் காண்பார்கள், கெட்ட கனவும் காண்பார்கள். ஒரு முஃமின் காணக்கூடிய நல்ல கனவு என்பது அல்லாஹ்விடமிருந்து கிடைக்கிற ஒரு நன்மாராயமாகும். எனவே, நல்ல கனவு கண்டால் அதை நெருக்கமானவர்களிடம் கூறுவதை நபிகள் நாயகம் (ஸல்) அவர்கள் அனுமதித்துள்ளார்கள். கெட்ட கனவு என்பது ஷைத்தானுடைய தூண்டுதலால் ஏற்படக்கூடியது. எனவே, அதைக் கண்டால் ஷைத்தானிடமிருந்து பாதுகாப்புத் தேட வேண்டும், அதை யாரிடமும் சொல்லக் கூடாது.
சிலர் மற்றவர்களின் நெருக்கத்தைப் பெறுவதற்காகவோ, முகஸ்துதிக்காகவோ அல்லது தன்னுடைய பெருமையை வெளிப்படுத்துவதற்காகவோ தான் காணாத ஒரு கனவைக் கண்டதாகப் பொய் சொல்வார்கள். பொதுவாகப் பொய் சொல்வதே இஸ்லாத்தில் தடை செய்யப்பட்ட பெரும் பாவமாகும். குறிப்பாகக் கனவின் விஷயத்தில் நபிகள் நாயகம் (ஸல்) அவர்கள் கடுமையாக எச்சரித்துள்ளார்கள். "யாரொருவர் தான் காணாத ஒன்றைக் கனவில் கண்டதாகச் சொல்வாரோ, அவர் நாளை மறுமையில் இரண்டு கோதுமை மணிகளை ஒன்றாக இணைத்துக் கட்ட வேண்டும் என்று நிர்ப்பந்திக்கப்படுவார்" என்று கூறினார்கள். இரண்டு கோதுமை மணிகளைக் கட்டுவது என்பது சாத்தியமற்றது, அதாவது அவர் கடுமையான தண்டனைக்கு உட்படுத்தப்படுவார் என்பதே இதன் அர்த்தமாகும். எனவே, தான் காணாத ஒரு விஷயத்தைக் கனவில் கண்டதாகக் கூறுவது பெரும் பாவமாகும்; இதை நாம் கண்டிப்பாகத் தவிர்த்துக்கொள்ள வேண்டும்.