இதில் எவ்வித முரண்பாடும் இல்லை. இந்த குர்ஆன் வசனத்தை நாம் சரியாகப் புரிந்து கொள்ளாததே இத்தகைய சந்தேகங்களுக்குக் காரணமாகும்.
கர்ப்பத்தில் சிசு ஆணா பெண்ணா, அதன் வளர்ச்சி எப்படி இருக்கிறது என்பதை அறியும் முறை இன்று ஸ்கேனிங் மூலம் மட்டுமல்ல; 1500 வருடங்களுக்கு முன்பிருந்தே அனுபவமிக்க மருத்துவச்சிகளால் ஓரளவு கணிக்கப்பட்டு வந்த ஒன்றுதான். எனவே "கர்ப்பத்தில் உள்ளதை அல்லாஹ் அறிவான்" என்ற வசனம், சிசு முழுமையாக உருவாகி, மருத்துவர்களால் கண்கூடாகப் பார்க்க முடிகின்ற வளர்ச்சிக் கட்டத்தைக் குறிப்பதல்ல; மாறாக, கருவளர்ச்சியின் தொடக்க நிலையைக் (ஆரம்பக் கட்டத்தை) குறிப்பதாகும்.
ஆரம்பக் கட்டத்தில், அந்த விந்தணு கருவாகக் கட்டுமா? அது எந்தப் பாலினமாக உருவாகும்? அதன் முழுமையான ஆரம்பச் செயல்பாடு என்ன? என்பதை உலகில் உள்ள எந்தவொரு நவீன விஞ்ஞானத்தாலும், தொழில்நுட்பத்தாலும் 100 சதவீதம் உறுதியாகக் கூற முடியாது. செயற்கை முறை கருத்தரிப்பில்கூட (IVF), கருப்பையில் வைக்கப்பட்ட பின் அது ஆணா பெண்ணா என்பதை ஒரு மாதமோ அல்லது சில மாதங்களோ கழித்து ஸ்கேன் செய்துதான் கூற முடியுமே தவிர, கருக்கட்டும் அந்த ஆரம்ப விநாடியில் உறுதியாகக் கூற முடியாது.
எனவே, உலகத்தில் எந்த விஞ்ஞானமும் அணுக முடியாத, மனிதக் கண்களுக்கோ தொழில்நுட்பத்திற்கோ எட்டாத அந்த ஆரம்பக் கருக்கட்டும் நிலையையே "கர்ப்பத்தில் உள்ளதை அல்லாஹ்வே அறிவான்" என்று குர்ஆன் குறிப்பிடுகிறது. உருவான பின் ஸ்கேன் செய்து பார்ப்பது இறைவனின் மறைவான ஞானத்திற்கு (கைப்) முரணானது அல்ல.