ஒரு முஸ்லிம் மரணித்துவிட்டால் அவருக்கு செய்ய வேண்டிய நான்கு கடமைகள் உண்டு: குளிப்பாட்டுவது, கபனிடுவது, தொழுவிப்பது, அடக்கம் செய்வது. இந்த நான்கு கடமைகளையும் இயன்ற அளவுக்கு அவசரமாக செய்துவிட வேண்டும் என்பது பொதுவான மார்க்க அடிப்படையாகும்.
ஆனால், சில நியாயமான காரணங்களுக்காக ஜனாஸாவை சில நாட்கள் தாமதப்படுத்த மார்க்கத்தில் அனுமதி உள்ளது. உதாரணமாக, வெளிநாட்டில் இருக்கும் மகன் வந்து தனது தந்தையின் தொழுகையில் கலந்துகொள்ள வேண்டும் என்று ஆசைப்படுவதற்காக காத்திருத்தல், ஒரு குற்றம் நடந்ததை நிரூபிக்க பிரேத பரிசோதனைக்காக உடலை பாதுகாத்தல், மோசமான தட்பவெப்ப நிலை காரணமாக உடல் சிதையாமல் இருப்பதற்காக பாதுகாத்தல், அல்லது வெளிநாட்டில் மரணித்தவரின் உடலை சட்டரீதியான தூதரக அனுமதிகள் பெற்று சொந்த நாட்டிற்கு அனுப்புவதற்கான காலதாமதம் போன்ற சூழ்நிலைகளில் குளிரூட்டப்பட்ட பெட்டியில் ஜனாஸாவை பாதுகாத்து வைப்பது அனுமதிக்கப்பட்டதே. இவற்றுக்கெல்லாம் ரசூல் (ஸல்) அவர்களின் ஜனாஸா ஆட்சியாளர் தெரிவுக்காக சில நாட்கள் தாமதப்படுத்தப்பட்டதே முன்மாதிரியாகும்.
ஆனாலும், எந்தவிதமான நியாயமான தேவைகளுமின்றி, எல்லாரும் வரட்டும் என்று சாதாரணமாக ஒரு ஜனாஸாவை பல நாட்கள் குளிரூட்டியில் வைத்து தாமதப்படுத்துவது மார்க்கத்தின் பொதுவான அடிப்படைகளுக்கு முரணான குற்றமாகும்.