நபிகள் நாயகம் (ஸல்) அவர்களின் காலத்தில் பெருநாள் தொழுகை நடைபெறாத சூழ்நிலைகள் இருந்தன என்பதற்கு வரலாற்றில் சில சான்றுகள் உள்ளன. உதாரணமாக, ரமழான் மாதத்தில் பத்ரு யுத்தம் நடைபெற்ற போது, நபிகளார் போர்க்களத்தில் இருந்தார்கள்; அப்போது மதீனாவிலோ அல்லது வேறு வெட்டவெளியிலோ அவர்கள் பெருநாள் தொழுகையை நிறைவேற்றியதாக எந்த ஆதாரமும் இல்லை. அவ்வாறே, மக்கா வெற்றியின் (ஃபத்ஹ் மக்கா) போதும் பல்லாயிரக்கணக்கான முஸ்லிம்கள் மக்காவில் இருந்தும் அங்கு பெருநாள் தொழுகை நடைபெற்றதாக எந்தச் செய்தியும் பதிவாகவில்லை.
ஒருவேளை அவர்கள் பெருநாள் தொழுகையை வீடுகளில் தொழுதிருக்கலாம் என்றால், அதற்கான எந்த மார்க்க வழிகாட்டலோ ஹதீஸோ காணப்படவில்லை. பெருநாள் தொழுகை, ஜுமுஆ போன்ற இபாதத்கள் பொதுவாகத் தலைமைத்துவத்தின் கீழ் சமூகம் ஒன்றுகூடித் தொழ வேண்டியவைகளாகும். எனவே, ஏதேனும் தவிர்க்க முடியாத சூழ்நிலைகளில் சமூகம் ஒன்றுகூடிப் பெருநாள் தொழுகையை மைதானத்தில் நிறைவேற்ற முடியாத நிலை ஏற்பட்டால், அவரவர் வீடுகளில் தனியாகவோ ஜமாஅத்தாகவோ பெருநாள் தொழுகையை நிறைவேற்றுவதற்கு குர்ஆனிலோ சுன்னாவிலோ நேரடியான எந்த வழிகாட்டலும் இல்லை என்பதே குர்ஆன் சுன்னாவிற்கு நெருக்கமான நிலைப்பாடாகும்.