இசை மற்றும் வாத்தியக் கருவிகள் இஸ்லாத்தில் முற்றுமுழுதாக ஹராமாக்கப்பட்டவை என்பதில் எவ்விதச் சந்தேகமுமில்லை. நபிகள் நாயகம் (ஸல்) அவர்கள் அதனைத் தெளிவாகத் தடுத்துள்ளார்கள்.
'நஷீத்' (இஸ்லாமியப் பாடல்கள்) என்ற பெயரில் வெளியிடப்படும் பாடல்களைப் பொறுத்தவரை:
1. தடைசெய்யப்பட்டவை: ஷிர்க்கான (இணைவைப்பு) கருத்துக்கள், ஆபாசமான வார்த்தைகள், பெண்களின் குரல் அல்லது பெண்களின் குரல் அமைப்பை ஒத்த நளினமான குரல்கள், மற்றும் பின்னணி இசை ஆகியவை கலந்திருந்தால் அது எந்தப் பெயரில் வந்தாலும் ஹராமாகும்; அதனைக் கேட்கக் கூடாது.
2. அனுமதிக்கப்பட்டவை: எவ்வித இசைக் கருவிகளுமின்றி, மார்க்க முரணான கருத்துக்களுமின்றி, இறைவன், மார்க்கம், இறைத்தூதர் பற்றிய நல்ல கருத்துக்களையும் ஆர்வமூட்டும் செய்திகளையும் பாடலாகப் பாடுவதில் மார்க்கத்தில் எவ்விதத் தடையுமில்லை. ஒரு மனிதர் தனது மன நிம்மதிக்காகவோ (Relaxation) அல்லது ஆர்வத்துக்காகவோ இத்தகைய தூய்மையான பாடல்களைப் பாடுவதோ, கேட்பதோ அனுமதிக்கப்பட்டதேயாகும்.
இருப்பினும், குர்ஆன் ஓதுவது மற்றும் மார்க்க உரை கேட்பதை விட, இத்தகைய நஷீத்கள் நமது வாழ்வில் மிகைத்துவிடக் கூடாது. நஷீத்களின் ஊடாகத்தான் மார்க்கப் பிரச்சாரம் செய்ய வேண்டும் என்ற எண்ணம் மேலோங்கினால், அது ஷைத்தான் எம்மைத் திசைதிருப்பும் ஒரு வழியாக மாறிவிடும் என்பதில் நாம் எச்சரிக்கையாக இருக்க வேண்டும்.