1. மொத்த ஸஹீஹான ஹதீஸ்கள்:
இஸ்லாமிய அறிஞர்களின் கணிப்பீட்டின்படி அண்ணளவாக 10,000 ஸஹீஹான ஹதீஸ்கள் (மத்தன் / செய்தி அடிப்படையில்) உள்ளன. இதற்குரிய அறிவிப்பாளர் வரிசைகள் (இஸ்னாத்) பல லட்சங்களாக அமையலாம், மேலும் மேலதிகத் தகவல்களோடு பல செய்திகள் வரலாம். ஆனால் தனித்துவமான செய்திகள் என்று பார்த்தால் சுமார் 10,000 வரை தேறும்.
2. ஸஹீஹான ஹதீஸ்களைத் தொகுக்க நினைத்த இமாம்கள்:
ஸஹீஹான ஹதீஸ்களை மட்டும் தொகுக்க வேண்டும் என்று இமாம் புகாரி, இமாம் முஸ்லிம், இமாம் இப்னு ஹுஸைமா, இமாம் இப்னு ஹிப்பான், அபூ அவானா, அபூ யஃலா, ஹாக்கிம் போன்ற அறிஞர்கள் எண்ணினார்கள். இதில் தமது எண்ணத்தில் முழுமையாக வெற்றி பெற்றுத் தொகுத்தவர்கள் இமாம் புகாரியும் இமாம் முஸ்லிமும் தான். இமாம் ஹாக்கிம், இப்னு ஹுஸைமா, இப்னு ஹிப்பான் ஆகியோரின் நிபந்தனைகளில் ஏற்பட்ட தவறுகளால் அவர்களது நூல்களில் பலவீனமான ஹதீஸ்களும் இடம்பெற்றுவிட்டன.
3. புகாரி, முஸ்லிமின் தரம்:
ஸஹீஹுல் புகாரியில் விரல் விட்டு எண்ணக்கூடிய ஓரிரு ஹதீஸ்களும், ஸஹீஹ் முஸ்லிமில் ஒரு 15-20 ஹதீஸ்களும் அறிவிப்பாளர் வரிசை ரீதியாக விமர்சனத்திற்கு உள்ளாகியுள்ளன (உ-ம்: உறவின் உச்சியை அடையாவிட்டாலும் குளிக்க வேண்டும் என்ற ஹதீஸில் வரும் "நானும் ஆயிஷாவும்..." என்ற வார்த்தை பிரயோகம்). இது போன்ற ஓரிரு பலவீனங்களைத் தவிர, இந்த நூல்கள் 100 சதவீதம் ஸஹீஹானவையே. அந்தச் சிறு விமர்சனங்களும் கூட பொதுவான மார்க்கத் தீர்ப்பை எந்த வகையிலும் மாற்றாது.
4. ஏனைய கிரந்தங்களின் நிலை:
இமாம் அபூதாவூத் தன் சுனனில் ஸஹீஹ், லயீஃப் என்பதை விளக்குவார்; அவர் மௌனமாக இருந்தால் அது ஸஹீஹாகவோ ஹஸனாகவோ இருக்கலாம். இமாம் திர்மிதி தனது சுனனில் ஒரு ஹதீஸ் கலை அறிஞரின் அணுகுமுறையோடு, அதன் தரம், தொடர்புடைய செய்திகள், யார் யார் அறிவித்தார்கள் என அனைத்தையும் விளக்குவார். இமாம் நஸாயீயும் விமர்சனங்களோடு பல அறிவிப்புகளைத் தொகுத்துள்ளார். இப்னு மாஜா என்பது பிற்காலத்தில்தான் குதுபுஸ் சித்தா (ஆறு கிரந்தங்கள்) பட்டியலில் சேர்க்கப்பட்டது.