உயர்ந்தோன் அல்லாஹ்வின் பெயர் பொறிக்கப்பட்ட மோதிரம் அணிந்து கழிவறைக்குச் செல்வது. அனஸ் (ரலி) அவர்கள் கூறியதாவது: நபி (ஸல்) அவர்கள், கழிவறையில் நுழையும்முன் (அல்லாஹ்வின் பெயர்பொறிக்கப்பட்டிருந்த) மோதிரத்தைக் கழற்றிவிடுவார்கள். அபூதாவூத் இமாம் கூறுகிறார்: இந்த நபிமொழி ‘முன்கர்’ (நிராகரிக்கப்பட்டது) என்ற வகையைச் சார்ந்தது. இந்த நபிமொழி இப்னு ஜுரைஜ் —> ஸியாத் பின் ஸஃத் —> ஸுஹ்ரீ —> அனஸ் (ரலி) என்ற அறிவிப்பாளர்தொடரில், “நபி (ஸல்) அவர்கள் வெள்ளி மோதிரம் ஒன்றை அணிந்திருந்தார்கள். பின்பு அவர்கள் அதை(க் கழற்றி) எறிந்து விட்டார்கள்” என்றே (மற்றவர்களால்) அறிவிக்கப்படுகிறது. “இதைக் கழிவறைக்குச் செல்லும்போது கழற்றிவைத்து விடுவார்கள்” என்று ஹம்மாம் பின் யஹ்யா அவர்கள் மட்டுமே, (இவ்வாறு) இப்னு ஜுரைஜிடமிருந்து தவறாக அறிவித்துள்ளார்.