முகமனுக்குப் பதிலுரைப்பது, ஒரு முஸ்லிம் மற்றொரு முஸ்லிமுக்குச் செய்ய வேண்டிய கடமைகளில் ஒன்றாகும். அல்லாஹ்வின் தூதர் (ஸல்) அவர்கள் கூறினார்கள்: ஒரு முஸ்லிம் தம் (கொள்கைச்) சகோதரருக்குச் செய்ய வேண்டிய கடமைகள் ஐந்தாகும். முகமனுக்குப் பதிலுரைப்பது, தும்மி (“அல்ஹம்துலில்லாஹ்” என்று கூறி)யவருக்கு (“யர்ஹமுகல்லாஹ்” என்று) மறுமொழி கூறுவது, விருந்தழைப்பை ஏற்பது, நோயாளியை நலம் விசாரிப்பது, ஜனாஸாவில் கலந்து கொள்வது. இதை அபூஹுரைரா (ரலி) அவர்கள் அறிவிக்கிறார்கள். இந்த ஹதீஸ் இரு அறிவிப்பாளர்தொடர்களில் வந்துள்ளது. முஸ்லிம் இமாம் கூறுகிறார்: (இதன் அறிவிப்பாளர்களில் ஒருவரான) அப்துர் ரஸ்ஸாக் (ரஹ்) அவர்கள் கூறுகிறார்கள்: (பொதுவாக) இந்த ஹதீஸை மஃமர் (ரஹ்) அவர்கள், ஸுஹ்ரீ (ரஹ்) அவர்களிடமிருந்து “முர்ஸலாகவே” அறிவிப்பார்கள். ஒரு முறை மஃமர் (ரஹ்) அவர்கள், “ ஸுஹ்ரீ (ரஹ்) —> ஸயீத் பின் அல்முஸய்யிப் (ரஹ்) —> அபூஹுரைரா (ரலி) ” என்று (முஸ்னதாக-முழுமையான அறிவிப்பாளர்தொடரில்) அறிவித்தார்கள்.