துல்ஹஜ் மாதத்தின் ஆரம்ப எட்டு நாட்களிலும் நோன்பு நோற்கலாமா?

துல்ஹஜ் மாதத்தின் ஆரம்ப பத்து நாட்களும் மிகவும் சிறப்புக்குரிய நாட்களாகும். இந்நாட்களில் நல்லமல்கள் செய்வது அல்லாஹ்வுக்கு மிகவும் விருப்பமானதாகும் என நபிகள் நாயகம் (ஸல்) அவர்கள் குறிப்பிட்டுள்ளார்கள். துல்ஹஜ் 9-வது நாளான அரஃபா தினத்தில் நோன்பு நோற்பதை நபிகளார் சிறப்பாக வலியுறுத்தியுள்ளார்கள்; இது முந்தைய மற்றும் பிந்தைய வருடப் பாவங்களுக்குப் பரிகாரமாக அமையும். 10-வது நாள் பெருநாள் என்பதால் நோன்பு நோற்பது ஹராமாகும்.

முதல் எட்டு நாட்களைப் பொறுத்தவரை, நபிகளார் தொடர்ச்சியாக எட்டு நாட்களும் நோன்பு நோற்றார்கள் என்று வரக்கூடிய ஹதீஸ்கள் பலவீனமானவையாகும். எனவே, எட்டு நாட்களும் நோன்பு நோற்பதை பிரத்தியேகமான "சுன்னத்" என்று உறுதியாகக் கூற முடியாது. ஆயினும், இந்த பத்து நாட்களிலும் நல்லமல்கள் செய்வது பொதுப்படையாக ஆர்வமூட்டப்பட்டுள்ளதால், நோன்பும் ஒரு சிறந்த நல்லமலாகவே கருதப்படுகிறது. எனவே ஒருவர் அந்த எட்டு நாட்களிலும் நோன்பு நோற்க விரும்பினாலோ, அல்லது திங்கள், வியாழன், ஒரு நாள் விட்டு ஒரு நாள் போன்ற அடிப்படையில் நோன்பு நோற்க விரும்பினாலோ அதற்கு மார்க்கத்தில் பூரண அனுமதியுள்ளது.