கூட்டு துஆ (அத்துஆவுல் ஜமாஅத்) என்பது, தொழுகைக்குப் பின் இமாம் துஆ கேட்கப் பின்னால் உள்ளவர்கள் கூட்டாக ஆமீன் சொல்லி முடிப்பது போன்ற நடைமுறையாகும். இந்த நடைமுறைக்கு குர்ஆனிலோ ஹதீஸிலோ எந்தவிதமான அடிப்படையும் காண முடியவில்லை.
தொழுகையிலோ, ஒரு சாப்பாட்டு சபையிலோ அல்லது வேறு எந்த சபையிலோ இமாம் துஆ கேட்க எல்லாரும் கையேந்தி ஆமீன் சொல்லி கலைந்து செல்லும் முறை நபிகள் நாயகம் (ஸல்) அவர்களின் காலத்தில் இருக்கவில்லை. கஷ்ட காலங்களில் ஐவேளைத் தொழுகையில் வித்ரு (குனூத் நாஸிலா) ஓதிய நேரத்தில் ஆமீன் சொன்னார்கள் என்ற செய்தி வருகிறதே தவிர, அதனை வைத்து எல்லா இடங்களிலும் துஆ கேட்டு கூட்டாக ஆமீன் சொல்லலாம் என்று எந்த ஆதாரமும் இல்லை.
தொழுகையில் இமாம் ''வலள்ளாலீன்'' என்று சொன்னவுடன் ''ஆமீன்'' சொல்வது என்பது, ரசூலுல்லாஹி (ஸல்) அவர்கள் கற்றுத்தந்த பிரத்தியேகமான சுன்னாவாகும். அதனோடு அந்தச் சட்டம் முடிந்துவிடுகிறது. அதை வைத்து எல்லா இடங்களுக்கும் பொதுவான ஆதாரம் தேடக் கூடாது. எனவே, கூட்டு துஆ என்பது பித்அத் (மார்க்கத்தில் புதிதாக உண்டாக்கப்பட்ட செயல்) என்பதில் எவ்விதச் சந்தேகமும் கிடையாது. இரண்டு பேர் பேசிக்கொண்டிருக்கும் போது ஒருவர் ஒரு நல்வாழ்த்தையோ துஆவையோ கூறினால் மற்றவர் ''ஆமீன்'' என்று கூறுவதில் தவறில்லை; ஆனால் ஒரு சபையில் ஒருவரை துஆ கேட்கச் செய்து மற்றவர்கள் கையேந்தி கூட்டு துஆவாக நடத்துவது என்பது எந்த ஆதாரமும் இல்லாத முற்றிலும் ஒரு பித்அத்தான நடைமுறையாகும்.