தற்கொலை செய்து கொண்ட ஒரு மனிதர் ரசூல் (ஸல்) அவர்களிடம் கொண்டு வரப்பட்ட போது, ரசூல் (ஸல்) அவர்கள் அவருக்குத் தொழுவிக்கவில்லை என்ற செய்தி ஸஹீஹ் முஸ்லிமில் ஆதாரப்பூர்வமாகப் பதிவு செய்யப்பட்டுள்ளது. இப்னு மாஜா, முஸ்னத் அஹ்மத் போன்ற நூல்களில் "மக்களை ஒழுக்கப்படுத்துவதற்காக இப்படிச் செய்தார்கள்" என்ற மேலதிக தகவலோடு இச்செய்தி வருகிறது. அந்த மேலதிகத் தகவல் (ஷரீக் இப்னு அப்துல்லாஹ் அல் காதி என்ற அறிவிப்பாளர் காரணமாக) பலவீனமானதாக இருந்தாலும், ரசூல் (ஸல்) அவர்கள் தற்கொலை செய்தவருக்குத் தொழுவிக்கவில்லை என்பது உறுதியான செய்தியாகும்.
ரசூல் (ஸல்) அவர்கள் ஏன் அவருக்குத் தொழுவிக்கவில்லை? தற்கொலை செய்தவர் காஃபிர் ஆகிவிட்டாரா? இல்லை. அவர் இஸ்லாத்தை விட்டு வெளியேறவில்லை. ஆனால், இது போன்ற பகிரங்கமான பெரும் பாவங்களைச் செய்து மரணிப்பவர்களுக்கு சமுதாயத்தின் முக்கியஸ்தர்கள் தொழுவிக்கக் கூடாது என்பதுதான் இதன் அடிப்படையாகும். தற்கொலை செய்தவருக்கு யாருமே தொழுகை நடத்தக் கூடாது என்பது இதன் அர்த்தமல்ல. அவரது குடும்பத்தவர்கள் மற்றும் சாதாரண மக்கள் அவருக்குத் தாராளமாக ஜனாஸா தொழுகை நடத்தலாம்.
இதே அடிப்படையில்தான் பகிரங்கமாக வட்டி எடுப்பவர்கள், பகிரங்கமாகச் சாராயம் குடிப்பவர்கள், மார்க்கம் தடுத்த பெரும் பாவங்களை பகிரங்கமாகச் செய்து கொண்டே மரணிப்பவர்களுக்கும் இந்தச் சட்டம் பொருந்தும். இவர்களுக்கு ஊரில் உள்ள பள்ளி இமாம்கள், மார்க்க அறிஞர்கள், மற்றும் ஊர் தலைவர்கள் ஜனாஸா தொழுகையை முன்னின்று நடத்துவதைத் தவிர்க்க வேண்டும். ஊர் முக்கியஸ்தர்கள் இவர்களது ஜனாஸாவைப் புறக்கணிப்பது, சமுதாயத்தில் இது போன்ற பாவங்களைச் செய்பவர்களுக்கு ஒரு எச்சரிக்கையாகவும், அவர்கள் தங்களைத் திருத்திக் கொள்வதற்கு ஒரு வழியாகவும் அமையும். இமாம் நவவி, இமாம் இப்னு தைமியா போன்ற பல மார்க்க அறிஞர்கள் இந்த நிலைப்பாட்டையே எடுத்துள்ளார்கள். எனவே தற்கொலை செய்தவர் காஃபிர் அல்ல; அவருக்குக் குடும்பத்தினர் தொழுவிக்கலாம், ஆனால் ஊர் தலைவர்களும் இமாம்களும் தொழுவிப்பதைத் தவிர்க்க வேண்டும் என்பதே சரியான மார்க்க நிலைப்பாடாகும்.